“कनिया”
झाँकि के झरोखा से पुरुआ झरकि आवे,
बाँस-बँसवारी चोंइ-चोंइ चीखे चौंकि के।
—————————————-
अंगना में बाढ़नि से बार-बार झारे पात,
झांग ले दुआरे पर खाढ़ माथ तोपि के।
—————————————-
दोसर-तिसर केकर मुंह जोहे राहे-राहे,
खंचिया में पतई उठावे अलोपि के।
—————————————-
कनिया गवनहरी के सोभा का बरनी,
करिखा आ काजर के छांटत मुंह तोपि के।
—————————————-
काँट-कूस धांगत उड़ावत आकासे धूरि,
पछुआ के छांटत बधारी बढ़े धोपि के।
—————————————-
बोझा सोरहिया के ढोइ-ढोइ थाकल-माँदल,
लरिका खेलावे अंचरवा से तोपि के,
—————————————-
“ऋषि” हम कतना ले सूरत बखान करीं,
सूनर-सोहाग सरिहारत रहे छूपि के।
—————————————-
